Si in perpendiculo et in plano inclinato, feratur quorum eadem sit altitudo, feratur idem mobile, tempora lationum erunt inter se ut plani inclinati et perpendiculi longitudines.

Sint ad planum orizontis 'cb' perpendiculus 'ab' et planum inclinatum 'ac', quorum eadem sit altitudo, nempe ipsa perpendicularis 'ab', et per ipsa descendat idem mobile: dico, tempus lationis per 'ab' ad tempus lationis per 'ac' esse ut longitudo 'ab' ad longitudinem 'ac'.

Cum enim assumptum sit, in naturali descensu velocitatis momenta eadem semper reperiri in punctis aequaliter ab orizonte distantibus iuxta perpendiculares distantias, continue augeri secundum rationem elongationis perpendicularis a linea orizontali, in qua pu fuit lationis initium, constat quod, producta linea orizontali 'am', quae ipsi 'bc' erit parallela, sumptisque in perpendiculo 'ab' quotcumque punctis 'e', 'g', 'i', 'l', et per ipsa ductis parallelis orizonti 'ed', 'gf', 'ih', 'lk', erit mobilis per 'ab' momentum seu gradus velocitatis in puncto 'e' idem cum gradu velocitatis lati per 'ac' in puncto 'd', cum punctorum 'e', 'd' eadem sit distantia perpendicularis ab orizonte 'am': et similiter concludetur in pun[c]tis 'f', 'g' idem esse velocitatis momentum, et rursus in punctis 'h', 'i', et 'k', 'l', et 'c', 'b'.

Et quia velocitas semper intenditur pro ratione elongationis a termino 'a', constat, in latione 'ab' tot esse velocitatis gradus, seu momenta, diversa, quot sunt in eadem linea 'ab' puncta magis ac magis a termino 'a' distantia; quibus totidem in linea 'ac' respendent [respondent], et per parallelas lineas determinantur, in quibus iidem sunt gradus velocitatis.

Sunt igitur in linea 'ab' quasi innumera quaedam spaciola, quibus multitudine quidem aequalia, et bina sumpta secundum eandem rationem respondentia, alia signantur in 'ac' per lineas innumeras parallelas ex punctis lineae 'ab' ad lin[e]am 'ac' extensas (intercepta enim spacia 'ad', 'df', 'fh', etc. ad spacia 'ae', 'eg', 'gi', etc. respondent singula singulis secundum rationem 'ac' ad 'ab'); suntque in singulis binis sibi respondentibus iidem velocitatis gradus.

Ergo, ex praecedenti, tempora omnia simul sumpta lationum omnium per 'ab', ad tempora omnia similiter accepta lationum omnium per 'ac', eandem habebunt rationem quam spacia omnia lineae 'ab' ad spacia omnia lin[e]ae 'ac'; hoc autem idem est, ac tempus casus per 'ab' ad tempus casus per 'ac' esse ut linea 'ab' ad 'ac': quod erat demonstrandum.