Alberti, Leone Battista De re aedificatoria 1485 | ||||||
|
Baptista siculus in auctoris persona Ad lectorem
Ingenuum superesset opus nunc Dædale: si me
Legisses: ualidis uolitare per aera pennis
Vidisses teneri trepidantia brachia nati
Posset et Archimedes totum qua uerteret orbem
Inuenta gaudere basi: curaque solutus
Siquis hyperboreos ardet discindere montes:
Aemulus assiduo superet babylona labore:
Condat et excelso pendentia culmina olympo
Velificatus athos narratur: iungere terras
Pontibus humana instruxit sollertia: sed te
non minus ista iuuent uolumus quam pagina signat.
Pugnabit nostra hæc armatos machina mutos
Cautius: hac poterit se se hostis ab hoste tueri:
Terrigenisque minus nocuissent tæla tonantis:
Frustra et trinacrii sudassent brachia fabri:
Encheladus sicula nec iam premeretur harena.
Quo priuata domus / quo regia tecta struantur
Ordine: quo loca sacra deum ornes: quoue prophana
Certus eris: quo rura colas: quam fertilis illinc
Surgat ager: læta ut capiant uix horrea messes:
Inde operum uitia emendes qua regula: quem ut
Quisque modum rebus tandem proponat agendis:
Accedit post hæc romanæ gratia linguæ /
Si te forte iuuat / nulla pallescere culpa
Eloquii: eloquium hic est: quodque imiteris habebis /
Et quæ nulla tibi ueterum monumenta dedere /
Hic nosces: lecture meas si uoluere carthas
Non pigeat: loculisque tenax si parcere auaris
Dediscas: largas si bibliopola sonanti
Impleat ære manus. Nostros legisse labores
Non te poeniteat: celeri quos callidus arte
Impressor doctæ perstrinxit robore dextræ .